1,305 peacekeepers, nagsanay a katinnulong ti PNP

VIGAN CITY – Sangaribu tallo gasut ket lima a nagturpos iti panagsanay kas kameng ti Barangay Peacekeeping Action Team (BPATS)  ti naggigiddan a pinagsapata ni  Mayor Eva Marie Singson Medina iti programa a naangay iti Plaza Burgos ditoy siudad idi Mayo 4.

Kinuna ni Mayor Eva Marie Singson Medina nga ad-adda a  mapabileg ti pannakatagiben ti kappia ken talna iti Siudad ti Vigan babaen ti yaadu dagiti agpatrolia kadagiti barangay iti siudad.

“Iti agdama ket saan laeng a kadalusan a siudad iti Rehion Uno  ti Vigan no di pay katalgedan a siudad. Dayta ti makagapu no apay a diak pulos nagpangngadua a nangawat iti daytoy a programa idi idiaya ti PNP,” kinuna ti mayora.

Ti LGU ti Vigan ti nangiyabaga iti amin a masapul iti panagsanay kas iti nagastos bayat ti training, uniporme ken dagiti sertipiko a nayawat kadagiti PBATs.

Kanaig daytoy, kinuna ni SPO3 Orlando Cacdac, resource speaker, a maysa a programa ti PNP ti pannakaestablisar ti BPATs ket ni Ilocos Sur OIC Provincial Director Reynante Partible ti mangimaton iti sibubukel a Rehion Uno kas mangidaulo iti Police Community Relations (PCR) iti rehion.

Segun ken ni Cacdac, gagem daytoy a programa ti mangsanay iti limapulo ket maysa a kameng ti BPATS iti tunggal barangay tapno dagitoy ti katinnulong ti PNP iti pannakatagiben ti linak ken talna kadagiti barangay.

Nagdalan dagiti nagturpos iti tallo nga aldaw a panagsanay iti agduduma a benneg kas iti umno a panagimbestiga, panagresponde, women and children’s concern, first aid ken dadduma pay nga adda pakainaiganna iti panangipatungpal kadagiti linteg.

“Maymaysa ti PNP ken BPATs para iti pannakaitandudo ti linak ken kappia kadagiti barangay. Masapul ti panagsakripisio, ayat ken panangigigir iti pada a tao tapno maisalakan dagiti kabarangayanyo manipud kadagiti dakes nga ima. Kas itay kunadan, mangrugi ti amin iti bagbagitayo,” kinuna ni Cacdac.

Kabayatanna, siinanama ni Vigan City Vice Mayor Ryan Luis Singson nga iyusar dagiti kameng ti BPATs dagiti nasursuroda para iti panagserbida kadagiti masakupanda.

“No adda panagkaykaysa ken kappia, adda panagdur-as,” kinuna ni Singson.#