131 slots para scholarship program ti TESDA-PESFA

VIGAN CITY –  Agdagup iti 131 slots ti nakasagana a maitanggaya kadagiti kayatna ti agbalin nga iskolar iti babaen ti Technical Education Skills Development Authority Provincial Officer-Private Education Student Financial Assistance (TESDA-PESFA), daytoy ti naammuan manipud iti provincial officer daytoy nga opisina itay nabiit.

Kinuna ni TESDA Provincial Director Joel Pilotin nga iti babaen ti TESDA-PESFA, adda intuding ti opisinana a 60 slots para kadagiti taga-First District ti Ilocos Sur ken 71 slots para kadagiti adda iti second district.

Naammuan ken ni Pilotin a kadagiti maka-avail iti nasao nga scholarship program ket naituding nga agbasada iti Macro Colleges (Front Office Services), Cabugao Institute (Computer Hardware Servicing); Sacred Heart iti Cabugao (Food and Beverage Services) para iti umuna a distrito, ken iti NICOSAT College (Automotive Servicing); ken Asian Institute of Research and Technology of the Philippines, Inc. (AIRTOP) Candon ken Tagudin (Computer Hardware Technician ken Bookkeeping) iti maikadua a distrito.

Agpaay laeng ti scholarship program a napunduan iti P1 milion kadagiti incoming freshmen a di pay nakapagkolehio nga agtawen iti 15 ken agpangato, segun iti provincial director.

Kinuna ni Pilotin a no nakapagkolehion ti aplikante, sabali a window ti TESDA ti papananna, ti Training for Work Scholarship Program.#