14 nga ili iti Ilocos Sur, naideklarar a drug-free – PDEA Provincial Chief

VIGAN CITY – Agdagup pay laeng iti 14 nga ili iti Ilocos Sur iti kadagupan dagiti 32 nga ili ken dua a siudad dagiti naideklarar nga illegal drug-free iti probinsia.

Daytoy ti inrakurak ni Philippine Drug Enforcement Agency (PDEA) Ilocos Sur Provincial Chief Anabel Cabarles kadagiti kameng ti media iti naangay a Dap-ayan Media Forum iti opisina ti Philippine Information Agency, Provincial Capitol, Vigan City idi malem ti Hunio 27, 2019.

Inlawlawag ni Cabarles nga adda pay 18 nga ili ken dagiti siudad ti Candon ken Vigan ti saan pay a na-cleared iti illegal a droga. Impakaammona a pito pay laeng a barangay sadiay Candon City, ken 10 pay laeng a barangay iti Vigan City dagiti na-cleared iti illegal a droga iti kadagupan dagiti nagadu a barangay kadagiti dua a siudad.

Impakaammo pay ti PDEA Provincial Chief a maibasar iti record, agdagup pay laeng iti 305 a barangay dagiti naideklarar a drug-free iti kadagupan dagiti 623 a barangay nga addaan kadagiti drug personalities manipud dagiti 768 a barangay iti Ilocos Sur.

Innaganan ni Cabarles dagiti ili nga indeklaran ti PDEA a drug free: Alilem, Banayoyo, Burgos, Del Pilar, Nagbukel, Quirino, San Emilio, San Esteban, San Ildefonso, San Juan, San Vicente, Sigay, Sugpon ken Suyo. Impakaammona a madama pay laeng ti validation ti pannakaideklarar a drug free ti ili a Lidlidda. Innagananna met dagiti uppat nga ili a maibilang a “hardly affected” ti ili ti Narvacan, Sinait, Tagudin ken Cabugao.

Inlawlawag ti PDEA Provincial Chief a ti pannakaideklarar a drug-free dagiti 14 nga ili ket maibasar iti pammasingked dagiti lokal Drug Abuse Council ken nagdalan iti nainget a validation ti PDEA ken Philippine National Police.

Iti kaso ti masansan a pakaisaysayangkatan ti pannakaraut ken pannagabut dagiti adu a mula a marijuana iti tri-boundary sadiay Sugpon, impasingked ni Cabarles a monitoren ken bantayan  a nasayaat dagiti akinsakup a kameng Drug Abuse Council ken PNP tapno maisardengen ti panagmulaan ti marijuana iti dayta a paset ti kabambantayan.

Inlawlawagna pay a maibasar iti record ti PDEA, shabu ti kangrunaan a maus-usar a droga ken matiltililiw iti Ilocos Sur, ken aggapu ti supply iti ruar ti probinsia.

Impakaammona pay nga agdagup iti 6,056 dagiti simmuko a drug personalities kabayatan ti Operation Tokhang, ken 5,537 dagiti natulongan tapno makapagbalbaliwda. Inrakurakna met ti kaadda ti Balay Silangan sadiay ili ti Tagudin a proyekto ti PDEA ken lokal a gobierno a pakaitaengan dagiti kayatna ti agreporma a sigud nga agus-usar ti illegal a droga.

Inaklon ti PDEA Provincial Chief a narigat a mapaksiat ti problema ti illegal a droga gapu ta nagrairan daytoy ken saanda a masolbar nga is-isuda laeng ket kasapulan ti suporta ti media, religious sector ken private sectors tapno masolbar daytoy parikut. Nagkiddaw kadagiti kameng ti lokal media iti tulong ken suporta iti panangirakurakda ti peggad ken kinadakes ti panagaramat ti droga, ken dagiti nagduduma a programa ti gobierno a mangsuporta kadagiti biktima nga agar-aramat iti droga. Impakaammona met ti hotline ti PDEA Ilocos Sur a Cellphone Number 09668113575 a mabalin a pagipulongn ti publiko kadagiti mapaliiwda nga aglaklako wenno agar-aramat ti illegal a droga.