14-wheeler truck, sinarubsobna waiting shed, alad, balay

SANTA, Ilocos Sur – Maysa a waiting shed, alad nga interlinks, ken parupa ti balay ti nagsasaganad a sinarubsob daytoy 14-wheeler truck iti aksidente a napasamak iti national highway a sakup ti Barangay Banaong, ditoy nga ili idi rabii ti Oktubre 6.

Kas maibatay iti blotter ti Santa police, agpaabagatan a direksion ti 14-wheeler truck nga addaan tractor head ken trailer a minaneho ni Cresencio Rumbaoa y Bingayen, 44, naasawaan, residente iti Brgy. Escoda, Marcos, Ilocos Norte ket idi makadanon iti lugar ti aksidente, napukaw ti drayber ti kontrolna iti manibela ket nagiwes daytoy sana dinungpar ti waiting shed iti akindaya nga abaga ti kalsada, ti perimeter fence ti balay ni Sherwin Ventura y Bajog, ken ti balay ni Dominador Bajog y Leones, sa nagbalangan iti highway a nakaigapu ti nakaro a trapiko.

Nupay nakaro ti dadael ti trailer truck, saan a naan-ano ti drayber ken ti katulongna a maysa a Mark Dane Vicente y Labayog, 30, naasawaan, ken residente iti Barangay 6, Laoag City.

Nawayaan met laeng ti kalsada iti agarup 4:00 ti agsapa ti Oktubre 7 babaen ti tulong ti PDRRMC, MDRRMC ken BFP Bantay#