142 armas nausar nga ebisensia kadagiti korte, napasubli ti PRO1

SAN FERNANDO CITY – Nasurok a sangagasut ket uppat a pulo a nadumaduma nga armas ti napasubli ti police regional office ditoy iti babaen ti programana a “Guns after the Custodia Legis”.

Kinuna ni Police Chief Supt. Romeo C. Hilomen, regional director a nakumpiska dagiti nasao nga armas babaen ti implementasion dagiti search warrants ken iti naing-inget a kampania maikontra kadagiti agraira nga armas kas paset ti “Oplan Bakal” ti PRO1 Task Force Armas ket naaramatda dagitoy kas ebidensia kadagiti nadumaduma a kaso iti korte.

Nakalanad iti babaen ti nasao a programa dagiti pagannurotan iti umisu a disposision dagiti narekobre nga ebidensia a naala dagiti PNP units ken stations iti panangiwayatda iti operasionda wenno naala bayat iti follow-up investigations, karaman dagiti armas nga illegal nga ikut wenno boluntario nga insuko ti maysa a tao iti polis.

Maibatay iti rekord ti PRO ditoy, narekobreda ti 142 a nadumaduma nga armas kadagiti agduduma a korte iti rehion 1 kalpasan iti pannakalpas ti litigasion dagiti kaso babaen ti koordinasion dagiti maseknan a clerk of court, prosecutors ken hues kas panagtungpal iti Supreme Court Memorandum Circular No. 47-98.

Segun iti Crime Incident Data Management System of the Regional Investigation and Detective Management Division (RIDMD), agdagup iti 1,456 dagiti armas ti nabilang manipud idi 2003 agingga iti agdama a naaramat a kas ebidensia kadagiti kaso a naipila iti korte.

Kinuna ni Hilomen a mangaramid iti representasion ken ni Police Director General Avelino Razon, Jr, PNP Chief, babaen ti hepe, Firearms and Explosives Division.Camp Crame, Quezon City, para iti pannakayisio dagiti narekobre nga armas kadagiti awan ti armasda a police personnel iti PRO1. (Danny Antalan)