1,500 maipuslit a manok, nakumpiska iti quarantine checkpoint

SINAIT, Ilocos Sur – Dua a lalaki ti tiniliw dagiti quarantine officials ditoy bayat ti panagipuslitda iti 1,500 a sibibiag a manok idi Nobiembre 14.

Malaksid a napagmulta iti P5,000.00 da Christopher Rojas ken ti katulonganna a ni Jay Garnace, agpada a residente iti Barangay Pantay Daya, Vigan City, nakumpiska pay dagiti maipuslit a sibibiag a manok a mapattapatta nga agbalor iti P180,000.00.

Segun iti report, saan a limmasat ti delivery truck a minaneho ni Rojas iti quarantine checkpoint a naipasdek iti igid ti national highway no di ket nagnada iti Barangay Dadalaquiten.

Kas maibatay iti Provincial Ordinance No. 15-06 Series of 2015, mailabsing iti linteg ti pannakaibiahe dagiti animal iti probinsia nga awanan iti veterinary health certificate ken shipping permit; kasta met a maisalungasing iti linteg ti panangilasat ti livestock dealer iti kargana nga animal iti sabali a rota a saan ket a ti nadesignaran a quarantine checkpoint.#