Footer

16 ili iti Abra, hot spot: PNP provincial director

BANGUED, Abra -Sangapulo ket innem nga ili ti maibilang a hotspots ditoy a probinsia, daytoy ti impakaammo ti PNP provincial director bayat ti naangay a maysa a forum para iti nadalus ken natalna nga eleksion ditoy itay nabiit.

Segun ken ni OIC Provincial Director P/Supt. Lawrence Coop, karaman dagiti hot spots ditoy probinsia ti Bangued, Bucay, Boliney, Dolores, Danglas, Tabuk, Lagangilang, PeHarubia, Tayum, Tubo, Tineg, La Paz, Lagayan, San Juan, Malibcong ken Sallapadan.

Inadmitir met ni CAR PNP Deputy Regional Director for Operations P/S Supt. Elmer Soria nga adda maysa a kumpirmado nga armado a grupo iti Abra idinto a tallo a sabsabali pay ti madama a sipsiputanda.

“Ammo metten ti amin ti kaso diay Tineg. Adda aganay 10 katao nga armado a mainanaig ken ni Mayor Edwin Crisologo,” kinuna ni Soria.

Babaen ti initiatibo ti Zenarosa Commission ken Abrenian Partners for Peace and Development (APPD), naangay idi Pebrero 12 ti maysa a citizens’ forum maikontra iti armed violence ken private armed groups tapno maaddaan ti nadalus ken natalna nga eleksion iti probinsia ti Abra.

Idauluan ni Justice Monina Zenarosa ti Zenarosa Commission ket da Jaime Echeverria, Dante Jimenez, Herman Basba Ho, Bishop Juan de Dios Pueblos, Mahmod Mala Adilao ken Virtus Gil dagiti commissioners ken Edilberto Adan, permanent adviser.

Inatenderan dagiti politiko manipud iti nadumaduma nga ili iti Abra, youth, religious sects, akademia, propesional, grupo dagiti babbai, mannalon, NGOs, business ken dadduma pay a sektor ti komunidad, kasta metten ti PNP ken AFP ti nasao a forum.

Kinuna ni Zenarosa a saan a kabaelan ti komision a solbaren ti parikut ti kaadda ti private armies isu a dinawatna ti kooperasion ti amin a sector tapno agballigi ti komision ken maaddaan iti natalna a panagpipili kadagiti lugar a hot spots.

“Iti panagkitak, nabannogen dagiti umili iti kinariribuk kasta met dagiti politiko. Ti laeng kayat dagitoy, kasapulan nga aggigiddanda a mangisuko kadagiti armasda,” kinuna ti chairperson.#