16 nga eksplosibo, nakali

BANTAY, Ilocos Sur – Sangapulo ket innem nga eksplosibo ti naireport iti police station ditoy a nakali iti compound ti Dunkin Donuts sadiay Barangay Taleb idi malem ti Oktubre 8.

Segun iti report, nakali dagiti trabahador dagiti eksplosibo iti paraangan ti mapatpatakder a kusina ti Dunkin Donuts a kukua ni Gemilio San Pablo idi agarup alas 9:00 ti bigat ti Oktubre 7.

Impakaammo a dagus dagiti polis iti ISPPO dagiti nakali nga ekplosibo ket dagus a nagresponde ti EOD ken ISPPSC iti panangidaulo ni SPO2 Niefo Benny Tababan para iti umisu a disposision dagitoy.

Kinuna ni Tababan a vintage 60 mm projectiles dagiti nakali nga eksplosibo.#