16 police officers, pinadayawan ti PNP chief

CAMP BGEN OSCAR M FLORENDO – Sangapulo ket innem a police officers ti naiyaspilian iti medalia iti ibibisita ti hepe ti Philippine National Police ditoy idi malem ti Mayo 9.

Mismo a ni Police Director General Alan La Madrid Purisima ti nangiyaspili iti medalia kadagiti 16 a police officers iti seremonia a naangay iti grandstand ti Police Regional Office ditoy.

Sakbayna, nabara a sinarabo dagiti dadaulo nga opisial ti rehion nga indauluan ni PRO1 Director Police Chief Supt. Ricardo C. Marquez ken provincial police officers ti hepe ti PNP babaen ti arrival honor nga impaay ti battalion sized police formation.

Immawat iti Medal of Merit (Medalya ng Kagalingan) da PSInsp. Artemio R. Clemente, PSInsp. Rodolfo G. Olinda, SPO1 Arnel I. Coloma, ken PO2 Christopher U. Pola idinto a Medalya ng Papuri ti naited kada  PSSupt. Reynaldo G. Biay, PSSupt. Ramon L. Rafael, PSupt. Marlon B. Canam, PSupt. Rhode A. Espero, PSupt. Froilan B. Lopez, PInsp. Jaime J. Lavarias, SPO4 Pablito C. Paningbatan, SPO3 Alexander P. Laroco, SPO1 Sherwin S. Cuenta, PO3 Danilo C. Cortez, PO3 Rufino B. Mendoza, ken PO2 Niño Robert.

Naited dagiti medalia kadagiti police officers gapu iti naballigi a pannakayimplementar dagiti search warrants ken checkpoints a nagtungpal iti pannakaaresto dagiti suspek kadagiti insidente ti pammaltog, ken dagiti nagsalungasing iti gun ban iti Region 1 a pakairamanan ti pannakakumpiska dagiti kolorum a paltogda ken balbala.

Kanaig daytoy, inyunay-unay ni Purisima kadagiti opisial ken personnel ti PRO1 ti saan koma a pannakiraman tunggal polis iti partisan politics, ketdi, aramidenda ti trabahoda, aniaman ti ranggoda, tapno masigurado ti natalna ken addaan kaipapanan nga eleksion.

Indagadag pay ni Purisima kadagiti polis ti panagsaganada ken ti panangipaayda iti amin a kabaelanda iti serbisio publiko saan laeng a tunggal eleksion no di pay iti inaldaw-aldaw a panagbiag.

Inimatangan pay ni Purisima ti pannakaiyawat dagiti ekuipo ti Internal Security Operations (ISO) a pakaibilangan dagiti ponchos, butane stoves, butane fluids, jungle knives, first aid kits, backpacks, ken mess kits kadagiti maneuver companies ti Regional Public Safety Battalion 1 (RPSB1) nga indauluan ni Battalion Commander Police Senior Supt. Reynaldo G. Biay.

Kalpasan ti closed-door conference kadagiti dadaulo ti regional ken police provincial offices, kinita ken ininspeksion ni Purisima dagiti nakumpiska nga armas manipud Enero 13 agingga iti Mayo 9.

Naggibus ti panagbisitana babaen ti maysa a press conference.#