16 trabahador, nayospital gapu’t panagsidada iti uong

SAN ESTEBAN, Ilocos Sur – Sangapulo ket innem a trabahador ti naitaray iti ospital gapu iti pannakasabidongda iti sindada nga uong idi Agosto 9.

Nabigbig dagiti biktima a da Ronald Balonzo, Manuel Domingo, Sonny Villena, Rey Villena, Rex Villena, Roger Obado, Rexor Ordonez, Bong Ordonez, Jong Duran, Edwin Estrada, Alvin Ordonez, Jerermy Guzman, Alex Bautista, Cesar Bautista ken maysa a managan Bing.

Naitaray iti rural health unit ditoy dagiti trabahador nga agpapada nga agtiktiktik iti baldosa ken residente iti Barangay San Pablo ditoy met laeng nga ili gapu iti pannakaulaw, panagkapsut ken panagsaruada kalpasan a nagsidada iti linutoda nga uong.

Iti pannakiuman ti DZTP kada Ronald Balonzo ken Manuel Domingo, kinunada a nasarakan dagiti kakaduada dagiti sindada nga uong iti aglawlaw ti maysa a bunton iti bantay a nagtiktikanda iti bato.

Kinunada a daytoy ti linutoda a pangngaldawda ngem kalpasan ti pannanganda, nakariknada metten iti pannakaulaw ken panagkapsut  sada nagsarsarua.

Naitaray dagiti trabahador iti rural health center ditoy nga ili ngem naiballakad a maipanda iti ospital idiay Narvacan.

Mapapati a napagsubli iti RHU dagiti biktima ti food poisoning gapu iti kaadu dagiti pasiente iti ospital.

Naammuan ken ni Dra. Annie De Guzman, RHU physician, a napakatan dagiti biktima, nangruna dagiti napakapsutan, iti dextrose, oresol wenno Gatorade, antibiotic.

Naammuan nga uppat ti napagbati iti rural health center agingga iti pimmigsada.#