16 urbon a baka, naipataraken kadagiti iskolar

SAN JUAN, Ilocos Sur – Sangapulo ket innem a baka ti naiyawat a taraknen dagiti iskolar nga agad-adal iti agrikultura iti BaRangay demo farm ditoy itay nabiit.

Segun ken ni Dr. Cesar Soller, project coordinator ti BaRangay demo farm, naited dagiti baka a taraknen dagiti scholars kas paset ti programa ti gobierno probinsial a makategged dagitoy kabayatan ti panagbasada.

Intanggaya ti Ilocos Sur Community College ti kurso a Ladderized Agriculture ket iti mismo a BaRangay demo farm ti pagadalan dagiti scholars.

Naammuan nga adda maibati a gatad kadagiti iskolar no mailako ti taraknenda nga animal.

Kabayatanna, impakaammo ni Soller a saan laengen a nuang no di uray baka ket mabalinen a mapasumpitan iti demo farm.

Paset daytoy ti gannuat ti gobierno probinsial a mapaadu ken mapasayaat ti puli dagiti nuang ken baka iti probinsia ti Ilocos Sur.

Kinuna ni Soller nga addan beterinario ti BaRangay demo farm nga agsumpit kadagiti dingnguen nga animal.

Awan ti bayadan dagiti mannalon a mapan agpasumpit iti baka wenno nuangda iti BaRangay demo farm tapno agsikogda, kinuna ti project coordinator.

Inwaragawag pay ni Soller nga aglaklakon ti demo farm iti mahogany ken sumagmamano nga agbunga a kayo iti nalaka a presio.

Nakapatanoren ti nasao a demo farm iti agdagup iti 14,000 a mahogany nga ilakoda iti P10 tunggal maysa.

Kinuna ni Soller a nailukaten ti panaglakoda iti napatanorda a 15,000 a grafted mango, guayabano ken atis.

Segun ken ni Soller, program thrust ti gobierno probinsial ti pannakapaberde ti probinsia ken kas addang para iti pannakalapped iti global warming.#