161 fully grown a marihuana, pinag-ot dagiti polis

SAN ESTEBAN, Ilocos Sur – Nasurok a sangagasut ken innem a pulo a pinuon ti marihuana ti pinarut dagiti nagtitipon nga elemento ti polis iti maysa a sitio ditoy nga ili idi agsapa ti Marso 21.

Nagtitipon dagiti elemento ti ISPAIDSOTG nga indauluan ni Police Chief Inspector Sosimo Racho, RIU, ISPPSC ken dagiti polis ditoy nga ili nga indauluan ni PI Joel Castillo, ACOP, babaen ti direkta a superbision ni Provincial Director Police Senior Supt. Noel Baguitan Amoyen ken iti koordinasion ti PDEA RO 1 a nangisayangkat iti marihuana eradication iti Sitio Bengang, Barangay Cappa-cappa ditoy nga ili ket pinarutda dagiti sumurok kumurang a 161 a fully grown a marihuana.

Mapattapatta nga agbalor iti P32,200.00 dagiti naparut a nalikmut iti berde ken nangisit a napino a net a mula a marihuana a nasukalan a naimula iti maysa a pagpastoran nga aglawa iti 180 metro kuadrado.

Kinumpiska pay dagiti polis ti dua a rolio ti napino a net a kolor berde ken nangisit, 3 a rolio ti hose, maysa nga sprinkle, maysa nga improvised a timba ken maysa a shovel a nasarakanda iti nasao a pagpastoran.

Awan ti natiliw a mangtartaraken dagiti mula a marihuana ngem nabigbig ti administrador ti daga a nakaimulaanda a maysa a Baltazar Corpuz y Ebojo, 70, naasawaan, ken residente iti nadakamat a barangay.

Naipan dagiti naparut a marihuana ken dagiti nakumpiska iti police station daytoy nga ili.#