16,219 nakapasa iti 2013 Nurses Licensure Exam

BAGUIO CITY – Inwaragawag ti Professional Regulation Commission (PRC) nga agdagup iti 16,219 ti nakapasa manipud iti 37,887 a nageksamen wenno 43% iti June 2013 Nurses Licensure Examination (NLE) nga insayangkat ti Board of Nursing kadagiti nadumaduma a testing centers iti sapasap a pagilian.

Kabayatanna, inwaragawag met ti Baguio Regional Office dagiti nakapasa iti nasao nga eksamen iti siudad ti Baguio, Dagupan, Cabanatuan, ken Laoag.

Iti Baguio City, 1,695 manipud iti 3,738 nga examinees wenno 45% dagiti nakaruar. Iti Dagupan City, 464 manipud iti 1,306 (36%) dagiti pimmasa idinto a 323 manipud iti 1,046 (31%) dagiti nageksamen a nakapasa iti Cabanatuan. Iti Laoag, agdagup iti 293 manipud iti 625 (47%) dagiti nakapasa.

Kanaig daytoy, kinuna ni Regional Director Teofilo Gaius M. Sison, Jr. a mangrugi ti panagpalista dagiti nakapasa iti siudad ti Laoag, Vigan, Cabanatuan, Dagupan ken San Fernando inton Hulio 16, 2013 . Maiposte ti aldaw ken venue iti www.prcbacuio.blogspot.com.

Maigunamgunam kadagiti agparehistro ti panangikuyogda dagiti sumaganad: duly accomplished Oath Form; 2013 community tax certificate; two passport-size pictures and a 1” x 1” picture (colored with white background and nametag: First Name, Middle Name, Last Name; ken inisial a registration fee a P6000.00 ken annual registration fee a P450.00 para iti 2013-2016.#