165 ektaria, puntiria ti MAO a mamulaan iti hybrid rice,

 NARVACAN, Ilocos Sur – Puntiria ti municipal agriculture office ditoy a 165 ektaria a kataltalonan ditoy  ti  mamulaan iti hybrid rice iti daytoy a tawen.

Kinuna ni Conrado Molina, agdama a municipal agriculture officer ditoy bayat iti interbio ti media kenkuana nga addan 90 a sako ti hybrid rice ti naiwarasen kadagiti mannalon ket namnamaenna nga ad-adunto pay ti ag-avail iti daytoy a programa ti gobierno munisipal.

Kinuna ni Molina a babaen ti subsidy program ti gobierno, manipud iti P2,400 nga orihinala presio ti hybrid rice, nagbalin laeng a P1,400 ti bayadan dagiti mannalon.

Innayon ni Molina nga iti 90 bags a hybrid rice, mamulaan metten ti 90 ektaria ket no namnamaenna nga iti pannakadanon ti bulan ti Mayo, umad-adu pay dagiti mannalon nga agala iti hybrid rice ket magun-odda ti targetda.

Naammuan ken ni Molina a maikkatanto pay ti presio ti hybrid rice iti P500.00 iti bulan ti Mayo.

“Adun ti nagpareserba kadakami a mannalon agsipud ta agbalinto laengen a P900 ti bayadanda iti daytoy Mayo kas maibasar iti circular manipud national office,”  inlawlawag ni Molina. (Danny Antalan)