17 mangngalap a Vietnamese, naaresto illegal agkalkalap kabaybayan ti Ilocos Sur

CABUGAO, Ilocos Sur – Sangapulo ket pito a mangngalap a Vietnamese a naglugan iti tallo a bilog ti natiliwan ti Philippine Navy nga illegal nga agkalkalap iti kabaybayan ti Ilocos Sur itay lawasna.

Kinuna ni Philippine Navy Commander Ronnie Paba, hepe ti Naval Task Group 11.1, a nasiiman dagiti operatiba ti Navy dagiti tallo a fishing vessels nga agkalkalap iti kabaybayan a sakup ti teritorio ti pagilian idi Septiembre 8.

Segun ken ni Paba, pito ti naispatanda a nakapundo iti kabaybayan ngem naglibasĀ  dagiti uppat idi masaripatpatan dagitoy nga umasidegda.

Nakakumpiska pay ti patrolia kadagiti lames a nakalapan dagiti Vietnamese fishermen a karga dagiti tallo a fishing vessels.

Kas maibatay iti report manipud iti polis-Cabugao, innem a mangngalap a Vietnamese a pakaibilangan da Trian Huu Tung, Bu Van Liem, Le Tien, Bui Van Luom, Huynh Ngoe Tian ken Lie Than Trung ti natiliw iti bilog a nagmarka iti BD.97467.TS; innem a mangngalap a pakairamanan da Trian Hoang Kim, Vo An, Phan Houi Tuy, Nguger Van Phuong, Ngryan Dy Guong and Vo Then ti naapput iti bilog a nagmarka iti BD.96209.TS; ken 5 a Vietnamese fishermen a pakairamanan da Dink Thien Son, Nguyen Gio, Hyunh Thanh Thang, Do Thenh Lai and Tran Hou Phuc ti karga ti bilog a nagmarka iti BD.95386.TS.

Immuna a naipan dagiti lugan ken dagiti Vietnamese fishermen iti Fort Salomague, Cabugao para iti inisial a dokumentasion ken inbentario.

Segun pay iti report manipud iti police station ti Cabugao, idi agarup 1:30 ti malem ti Septiembre 8,Ā  nangiwayat iti inspeksion dagiti nagtitipon a personnel ti Philippine Ports Authority, Bureau of Fisheries and Aquatic Resources, Bureau of Customs, Bureau of immigration, Maritime Group, Philippine Navy, Philippine Coast Guard, ken ti Cabugao police station kadagitiĀ Ā  nadakamat a fishing vessels a temporario a nagpundo iti Salomague Port, Cabugao, Ilocos Sur.

Kinuna ni Paba a masaklangan dagiti mangngalap iti illegal poaching ken illegal entry gapu ta awan ti naipakitada a legal a dokumento a napalubosanda a sumrek iti teritorio ti pagilian nga agkalap iti kabaybayan a sakupna.

Kinuna met ni Lieutenant Junior Grade Bernard O. Sabado, spokesman ti Naval Forces Nothern Luzon, a naipan dagiti 17 a mangngalap ken dagiti luganda iti headquarters sadiay Poro Point, La Union para iti pannakaprosesoda ken pannakaipila iti maikanatad a kaso maikontra kadakuada.#