17 naaresto a mangngalap a Vietnamese, napaggawid

SUAL, Pangasinan – Napalubosan a naggawid iti pagilianda dagiti 17 a Vietnamese nga inaresto ti Philippine Navy a mapapati nga illegal a nagkalap iti kabaybayan a sakup ti Pilipinas nasurok a makabulanen ti napalabas.

Mismo a nagturong ni Presidente Rodrigo Roa Duterte ditoy nga ili tapno palubosanna dagiti nasao a mangngalap nga aggawid iti pagilianda nga awan ti maikaso maikontra kadakuada ken awan ti multa wenno pannusa kadakuada.

Kinuna ni Duterte a napan iti Sual tapno palubosanna dagiti “padana a parsua” idinto nga innayonna a masapul a nauneg ti bukod a respeto iti maysa a parsua, uray aniaman ti nasionalidadna.

Kinuna ti Presidente a tinungpalna ti karina a mangpadaras iti panagsubli dagiti mangngalap a Vietnamese ken ti commitmentna iti gobierno ti Vietnam a mangtulong kadagiti mangngalap iti tarigagayda nga agsubli iti pagtaenganda ken iti pamiliada kas senial ti nasayaat a pannakilangen.

Maipalagip a naaresto dagiti 17 a Vietnamese a mangngalap a pakairamanan da Tran Huu Trung; Bui Van Liem; Nguyen Van Phuong; Nguyen Gio; Dinh Thien Son; Le Tien; Vo An; Vo Thien; Tran Huu Phuc; Huynh Thanh Thang; Le Thanh Trung; Nguyen Duy Cuong; Bui Van Luom; Pham Huu Tuy; Tran Hoang Kim; Hyunh Ngoc Tuan; ken Do Thien Loi, maysa a menor de edad, bayat ti panagkalapda iti kabaybayan a iti asideg ti Vigan City, Ilocos Sur idi Septiembre 8.

Naaresto dagiti mangngalap gapu iti panaglabsingda iti Section 91 iti Republic Act No. 10654, linteg a mangpasardeng, manglapped ken mangpukaw iti illegal, saan a naireport ken saan a regulated a panagkalap; RA 8550 nga inamendaran ti RA 10654 gapu iti “poaching” ken Section 37 ti Immigration Law gapu iti iseserrekda iti kabaybayan ti las-ud ti Pilipinas sadiay Poro Point, La Union nga awan ti inspeksion, pammalubos ken kaawan iti entry visa.

Nupay kasta, inikkan ti Department of Justice iti clearance dagiti mangngalap a Vietnamese nga agsubli iti pagilianda.

Malaksid iti naipabalon kadagiti mangngalap a 3,000 a litro ti gasolina, tallo sako a bagas, 9 a bloke ti yelo, 3 a dram ti presko a danum ken sumagmamano kilos a natnateng, adda pay sagut ken diaket a naited kadakuada.

Mismo nga ineskortan ti Philippine Navy ken ti Maritime group dagiti mangngalap agingga a nalabesda ti kabaybayan a sakup ti Pilipinas. (Manipud iti report ni Venus May H. Sarmiento, PIA 1, Pangasinan)