18 mayor, 16 bise mayor unopposed iti May 13 polls

VIGAN CITY – Sangapulo ket walo a mayor ken 16 a bise mayor ti arigna “nagpallailangda laeng iti parke” gapu ta awan ti kinasangoda iti kalkalpas a panagbubutos itay Mayo 13, 2013.

Naammuan ti Tawid News nga iti kadagupan a 18 a para mayor nga awan ti kinasangona, 14 ti nagpailayon.

Daytoy ti maikadua a daras a ti Ilocos Sur ti kaaduan ti bilang dagiti para mayor nga unopposed. Tallupulo ket dua nga ili ken dua a siudad ti mangbukel iti Ilocos Sur.

Idi 2010, kas maibatay iti rekord ti Commission on Electioons, 8 a para mayor iti Ilocos Sur ti awan ti kinasangoda.

Iti Vigan City, awan ti nakaitured a simmango ken ni agdama a Mayor Eva Marie S. Medina iti daytoy a panagpailayonna manen. Ngem tinegged daytoy ni Medina agsipud ta iti babaen ti panangiggemna iti rienda ti turay iti siudad, nagbalin daytoy a maysa kadagiti kangrunaan a tourist destination iti Amianan a Luzon ken maysa kadagiti siudad a nadaydayaw gapu iti best practices ken good governance. Itay laeng nabiit, naangay ditoy Vigan City ti World Costume Festival a nakipartisiparan dagiti nadumaduma a pagilian a nakipagselebrar kadagiti nadumaduma a kultura ken tradision babaen ti pannakikinnamayet ti Organisation Internationale des Scénografes, Techniciens et Architectes de Théatre (OISTAT).

Uray iti Caoayan, awan ti kinasango ni incumbent Mayor Germie Singson-Goulart, kabsat ni Gov. Luis “Chavit” Singson. Ngem kas ken ni Mayor Eva, nategged ni Mayor Germie ti respeto dagiti taga-Caoayan agsipud ta iti nabiit pay a panagtakemna a kas mayor, adu ti nagluposan daytoy nga ili saan laeng nga iti pisikal a langa no di pay iti pannakaipasdek dagiti pamastrekan a mangitag-ay iti panagbiag dagiti umili ditoy.

Iti Candon City, iti baet a neophyte, awan ti timmakder a sumango ken ni Dr. Ericson Singson, maysa pay nga anak ni dati a House Deputy Speaker  Eric Singson.

Iti umuna a distrito ti Ilocos Sur, makuna nga awan ti nagtedted a ling-etda a nagkampania dagiti uppat pay a nagkandidato a para mayor agsipud ta awan ti kinasangoda. Karaman ditoy da Sammy Boy Parilla ti Bantay, Mayor Mark Anthony Purisima ti San Ildefonso, Mayor Jose Tabanda III ti San Vicente, ken Mayor Amado Tadena ti Santo Domingo.

Iti maikadua a distrito ti probinsia,  sangapulo ket maysa nga  incumbent mayors ti nagkalkalumpio laeng gapu ta unopposed met dagitoy.

Karaman ditoy da Mar Ruel Sumabat (Alilem), Benjamin Maggay (Cervantes), Jessie Balingsat (Galimuyod), Clifford Patil-ao (Quirino), Leopoldo Gironella Jr. (Salcedo), Chester Elaydo (San Esteban), Jeremy Jesus Bueno (Santa), Teresita Valle (Sta. Cruz),  Josefino Miranda (Santiago), Aries Gaerlan (Sigay), and Fernando Quiton (Sugpon).

Kabayatanna, 16 a kandidato para bise mayor ti awan met ti kinasangoda iti kalkalpas nga eleksion.

Dagitoy dagiti sumaganad: Samson Bangaoil (Alilem), Willy Pre (Bantay), Nathaniel Escobar (Burgos), Deogracias Jose Savellano (Cabugao), Alfonso Singson (Candon City),  Fayinna Zaragoza (Narvacan), Robert El-I (Quirino), Ninya Gironella-Itchon (Salcedo), Mildred Elaydo (San Esteban), Michael Miranda (Santiago), Floro Tadena (Sto. Domingo), Jesus Bueno (Santa), Virgilio Valle (Sta. Cruz), Nancy Tabanda (San Vicente), Ferdinand Hernaez (Sta. Lucia) ken Lourdes Baquiran (Vigan City).#