18-wheeler truck, dinungpar ti motorsiklo, natay ti nagmaneho

CANDON CITY – Timmaliaw laeng ti nagmaneho iti nangpaguni kadakuada, ket iti apagdarikmat, naidungparna ti motorsiklona iti maysa a 18-wheeler truck a puon ti ipapatayna.

Natay ni Perfecto Inigo, 38, residente iti Barangay Tablac, Candon City idinto a nasugatan ti kalubbonna a ni Anacleto Pascua, 49, kalugaranna.

Segun iti inisial nga inbestigasion dagiti polis, agpadaya dagiti biktima a nakalugan iti Honda TMX ket iti nakapasamakan ti aksidente, adda nangpagunia kadakuada a puon ti itataliaw ti drayber ket naladawen idi makitana ti nakaparada nga 18-wheeler truck ket nadungparna.

Naitaray dagiti biktima iti ospital ngem naideklara ni Inigo a dead on arrival. Serioso met ti kasasaad ni Pascua.#