185 street lamps, maipasdek Bantay-Vigan airport

VIGAN CITY – Maysa a resolusion ti naidatag iti sangguniang panlungsod ditoy para iti iseserrek ni Mayor Eva Marie S. Medina iti katulagan para iti pannakaipasdek dagiti streetlamps iti dalan nga agturong iti eropuerto ditoy siudad.

Kinuna ni Konsehal John Patrick Singson, chairman iti committee on appropriation, sagudayen ti resolusion ti pannakaited iti otorisasion ken ni Mayor Medina a sumrek iti memorandum of agreement iti Department of Public Works and Highways para iti pannakainstolar iti 185 streetlamps iti Bantay-Vigan road agingga iti Vigan airport sadiay Barangay Mindoro.

Kinuna ni Singson a proyekto daytoy ti DPWH ket isuda ti makaammo iti pannakainstolar dagiti streetlamps.

Innayon ni Singson nga aggapu ti pondo iti pannakainstolar dagiti streetlamps manipud iti Road Board ket apaman a malpas ti DPWH, ipaimana ti proyekto iti gobierno iti siudad para iti pannakamentener ken electric bills daytoy.

Segun ken ni Singson, sigud nga adda sumangsangpet a kastoy a pondo iti siudad ti Vigan manipud iti DPWH.#