Footer

19 nagturpos iti training iti English proficiency

VIGAN CITY – Sangapulo ket siam a trainees ti nagturpos iti 100-hour English proficiency training program iti commencement exercises a naangay iti Baluarte ditoy itay nabiit.

Initiatibo ni Cong. Ronald Singson ti pannakairusat ti call center training “study now, pay later” program tapno makatulong iti pannakaipaay iti panggedan kadagiti kalugaranna.

Kinuna ni Singson nga inyalokarna ti umuna a tsekena a naawatna iti Congressional Development Fundna iti daytoy a programa.

Kinunana a babaen ti “study now, pay later” nga iskema, agtultulid ti pondo nga aramaten ti sumaruno a grupo dagiti trainees agsipud ta agtultuloy daytoy a programa kabayatan ti terminona.

Innayon ni Singson nga impatalged kenkuana ti training company a padarasenda iti pannakaiyemplo dagiti trainee-graduates kadagiti nadumaduma a call center companies.

Kasapulan iti 30 a trainees iti umuna a panagsanay ngem 19 ti nakatungpal ken nakaipasa iti screening test.

Kaaduan kadagiti nagsanay ti nakaturposen iti kurso ngem awan pay panggedanda.

“Dakkel a katulonganmi daytoy nga agbirok iti trabaho,” kinuna ti maysa a trainee.

Kabayatanna, inikkan ti nangisuro kadagiti trainees, ni Chito Nikko Samontina ti Edulynx Corporation, iti nasayaat a marka dagiti nagturpos.

Kinunana a saan nga agpayso ti  impression a nasikkil ti dila dagiti Ilokano nga agsao iti English gapu iti panagibalikas ken bengngatda idinto nga innayonna a saan a narigatan a nagisuro iti English proficiency kadagiti adalanna.

Ti Edulynx a natangdanan a service provider ti maysa kadagiti makabael nga English proficiency training company iti pagilian.#