Inter Town Basketball Tournament, 2nd District, nangrugi

CANDON CITY – Nangrugi ti Inter Town Basketball Tournament iti segundo distrito ti probinsia ditoy siudad idi Oktubre 27.

Sangapulo ket maysa a team manipud iti maikadua a distrito ti Ilocos Sur ti makisalip iti daytoy a torneo ti basketbol.

Da Senador Francis “Chiz” Escudero ken ni Heart Evangelista, maipadpadamag a gayyemna, ti kangrunaan a sangaili iti nasao a patorneo a tinabunuan pay da dati a House Deputy Speaker Eric Singson, Candon City Mayor Allen Singson, ken Congressman Ryan Singson a nangibagi ken ni Gov. Luis “Chavit” Singson.

Kalkalpas met ti Ronald Singson Basketball Tournament a nagsasalipan amin dagiti ili iti umuna a distrito a nagkampeonan ti Vigan City.

Segun ken ni Cong. Singson, kasango ti kampeon daytoy torneo iti maikadua a distrito ti kampeon iti torneo iti umuna a distrito.##