1st Ilokano Book Fair, maangay

VIGAN CITY – Maangay ti umuna a book fair nga Ilokano sadiay University of Northern Philippines auditorium inton Hulio 30 ken 31 a paglektiuran dagiti nalatak nga autor iti libro iti Tagalog kas kada Bebang Siy, Eros Atalia ken Dr. Michael Coroza ken dagiti mannurat nga Ilokano a pakaibilangan da Sherma E. Benosa, Anna Liza M. Gaspar ken Neyo Mario E. Valdez.

Pagtinnulongan nga iwayat ti GUMIL Filipinas (GF) ken UNP Center for Ilokano Studies, iti pannakitinnulong ti National Book Development Board (NBDB), ken Komisyon sa Wikang Filipino (KWF), tampok nga aktibidad bayat ti book fair ti pannakailako dagiti libro nga Ilokano nga impablaak ti GF ken dadduma pay nga independiente nga agipabpablaak ken ti pannakayalnag dagiti libro maipapan iti kontemporario a piksion nga Ilokano ken literatura para ubbing.

Addaan iti tema a “Lagip ni Don Belong, iti Libro Mataginayon”, tratarento ni nagretiro a Dekano ken premiado nga Ilokano a mannurat Gregorio Amano dagiti kontribusion ni Don Isabelo de los Reyes, nalatak nga anak ti Vigan City, mannurat, politiko, ken ama ti mangmangged a Filipino iti literature ti Ilokano ken iti panagiwarnakan.#