Footer

2 a balo naiwalang

SAN ILDEFONSO, Ilocos Sur – Maysa a balo ti mapapati a naiwalang iti barangay road a sakup ti Barangay Poblacion East ditoy nga ili idi rabii ti Nobiembre 29.

Nasarakan ti bangkay ni Allan Alvarado y Tabalan, 39, balo, residente iti nadakamat a barangay, iti uneg ti sidecar ti traysikelna a nagsagrap kadagiti sugat iti bagina.

Mapapati a pinaltogan dagiti di nabigbig a tattao ni Alvarado bayat ti panagdaliasatna iti nasao a barangay road idi agarup pasado alas dies ti rabii ti Nobiembre 29.

Segun kadagiti inbestigador ditoy, timmawag ni Gregorio Ragunton, security guard ti Philippine Science High Schhol nga on-duty iti dayta a rabii ket impakaammona nga inreport kenkuana ti maysa a nakamotorsiklo a lalaki nga adda nalabsanna a tao a mapapati a biktima ti pammaltog.

Iti panagimbestiga dagiti polis, nakarekobreda iti lima a kapsula a nagtaud iti cal. 45 iti nakapasamakan ti krimen.

Madama ti panagimbestiga dagiti polis no ania ti motibo ken sino ti nangisayangkat iti pammapatay.

Immun-una ngem daytoy, sabali pay a balo ti naiwalang iti Barangay Poblacion Sur, Sta. Maria, Ilocos Sur idi Nobiembre 28.

Nasarakan nga awanen ti biag ni Alfredo Peralta, Sr., y Desumala, 73, residente iti Barangay Mambog, Burgos, Ilocos Sur iti provincial road iti asideg ti sementerio ti nadakamat a barangay.

Mapapati a mapan koma makimisa ti biktima  a naglugan iti Honda TMX 155 idi sinaneb dagiti di nabigbig a supek sada pinaltogan iti sumagmamano a daras a nakatamaan ti bukot ken makannawan nga imana a nakatayanna a dagus.

Uppat a kapsula manipud iti cal. 45 ti narekobre dagiti inbestigador iti crime scene. Di pay ammo ti motibo ti pammapatay.#