2 a baro, nayospital iti aksidente ti lugan

CAOAYAN, Ilocos Sur – Dua a lalaki ti nadunor kalpasan a nainbolbarda iti aksidente idi bigat ti Agosto 10 iti national highway a sakup ti Barangay Callaguip ditoy nga ili.

Naitaray iti Gabriela Silang General Hospital iti Vigan City da Michael Roldan y Rosario, 17, baro, ken residente iti Barangay Tamag, Vigan City ken ni Aaron Fernandez y Arellano, 16, baro ken residente iti Barangay VIII, Vigan City.

Iti inisial nga inbestigasion dagiti polis, agpada nga agpaabagatan ti Suzuki Rider 150 motorcycle a minaneho ni Roldan ken ti Honda Wave a kukua ni Fernandez ngem minaneho ni maysa J. M. Navarro, taga-Barangay Anonang Mayor ditoy nga ili ket iti lugar a nakapasamakan ti aksidente, kellaat a simmardeng ti Suzuki ken nag-u-turn a puon ti nakadungparan kenkuana ti sumarsaruno a Honda Wave.

Naglibas ti drayber ti Honda kalpasan ti aksidente.#