2 aglaklako, natiliwan iti paputok

STA. MARIA, Ilocos Sur – Iti baet ti kampania maikontra iti panaglako iti illegal a paputok, dua a tindera ti natiliwan nga aglaklako kadagitoy iti tiendaan publiko ditoy nga ili idi aldaw ti Disiembre 19.

Nakumpiska dagiti lako a paputok da Lourdes Bolibola, residente iti Barangay Maynganay, ken Teresa D. Bernardo, residente iti Poblacion Norte, babaen ti operasion nga inwayat dagiti otoridad iti dayta nga aldaw.

Nakumpiska ken ni Bolibola, ti lima a bassit a box ti piccolo K-0201 ken 5 nga bassit a box ti piccolo K-0202.

Nakumpiska met ken ni Bernardo ti walo a bassit a box a naglaon iti great bawang.

Maiparit ti panaglako kadagiti napipigsa a paputok ditoy kas paset ti programa a panangpabassit iti bilang dagiti madesgrasia babaen iti paputok.#