2 agsusukot kasoda, naaresto

BANTAY, Ilocos Sur – Dua a lalaki nga agsusukot ti kasoda ti nagsina nga inaresto dagiti polis ditoy ken sadiay Nagbukel itay nabiit.

Idi agarup 11:35 ti bigat, inaresto dagiti polis-Bantay ni Wilfredo Arciento y Pico, 54, naasawaan, ken residente iti Barangay Boquig babaen ti bileg ti warrant of arrest nga inyisio ni Judge Alma Crispin B. Collado-Lacorte, Regional Trial Court, Branch 21, Manila ken ni Judge Bonhoefer V. Bernardez, presiding judge ti Municipal Trial Court, Bantay Ilocos Sur.

Akusado ni Arciento iti kaso a murder iti sala ni Judge Collado-Lacorte a nai-docket iti babaen ti Criminal Case No. 16-34-8480 ket nairekomenda nga agpiansa iti P100,000.00.

Sumangsango pay iti kaso a carnapping iti sala ni Judge Bernardez a nai-docket iti CC No. 16-34-8478 a nairekomenda nga agpiansa iti P60,000.00 ken iti kaso nga obstruction of justice a nai-docket iti babaen ti CC No. 3716 ken addaan piansa a P12,000.00.

Naikustodia ni Arciente iti police station ti Bantay para iti dokumentasion ken disposision.

Kabayatanna, inaresto dagiti nagtitipon nga elemento ti PCIDT, Ilocos Sur nga indauluan ni Police Chief Inspector Richard Palay, PIB, PIDMB, PPSC ken polis- Nagbukel ni German Ciubal y Pagarigan, 36, baro, ken residente iti Barangay Mapisi, Nagbukel idi agsapa ti Enero 9.

Imet dagiti polis idi inarestoda ni Ciubal ti warrant of arrest nga inyisio ni Judge Marita Bernales Balloguing ti Regional Trial Court, Branch 72, Narvacan a napetsaan iti Enero 5, 2017.

Akusado ni Ciubal iti statutory rape a nai-docket iti babaen ti Criminal Case No. 4246-N ken rape by sexual assault a nai-docket iti babaen ti CC No. 4247-N.

Awan ti nairekomenda a piansa ni Ciubal iti immuna a kaso idinto nga agpiansa iti P200,000.00 iti maikadua.

Sabali pay ti warrant of arrest nga inyisio ni Judge Gina Juan-Chan ti RTC Branch 22 maikontra ken ni Ciubal gapu kadagiti kasona a rape by sexual assault a nai-docket iti babaen ti CC Nos. 4248-N ken 4249-N.

Nairekomenda nga agpiansa ni Ciubal iti tig-P200,000.00 iti daytoy a dua a kaso.

Sabali pay ti kasona a acts of lasciviousness in relation to RA 7610 a nai-docket iti CC No. 4250-N nga addaan piansa a P36,000.00.

Naikustodia met ti akusado iti police station ti Nagbukel para iti disposision ken dokumentasion. (Tawid News Team)