2 agtutubo, natiliw nga agsussusop iti marihuana

CANDON CITY – Dua a lalaki ti natiliw ti polis nga agsigsigarilio iti marihuana iti grandstand iti likudan ti maysa a pagadalan ditoy siudad idi Abril 30.

Tiniliw ni PO1 Angelito Antalan da Jay Mark Lachica, 18, taga-San Jose del Monte, Bulacan ngem agnanaed ditoy siudad, ken ni Chester Gironella, 18, agnaed iti Barangay Darapidap ditoy siudad kalpasan a nasalamaanna ida bayat ti panagpatroliana nga agsigsigarilioda iti marihuana iti grandstand ti Candon South Central School a masarakan iti Barangay San Nicolas ditoy siudad.

Segun ken ni Antalan, nakitana dagiti dua nga agsinsinnublat nga agsusop iti sigarilio isu nga immasideg ngem nasiputanna nga intinnag ni Lachica ti sussusopenna sana binaddekan.

Maysa a plastic sachet a mapapati a naglaon iti marihuana ti mapapati a nakumpiska met iti ikut ni Gironella.

Iti pannakaisurat daytoy, naikustodia dagiti dua iti police station.#