Footer

2 airlines, kayatda agbiahe iti Vigan-Manila

Cabugao, Ilocos Sur  – Dua a kompania ti eroplano ti mayat a maaddaan iti rota iti Vigan-Manila no la ketdi ta magaw-atda ti kangrunaan a pagrukodanda, daytoy ti impakaammo ni Gob. Deogracias Victor “DV” Savellano bayat ti  miting ti liga dagiti mayor iti Ilocos Sur a naangay iti daytoy nga ili idi Nobiembre 25.

Segun ken ni Savellano, kasapulan a magarantiaan ti kaadda ti tallopulo a pasahero iti tunggal panagbiahe dagiti eroplano.

Kinuna ti gobernador a madaman ti pannakaplantsa ti singir ti plete ta medio adda nginngina ti immuna nga imparang dagiti di pay nainaganan nga airlines.

Kinuna ni Savellano a planona ti mangangay iti maysa nga all-sectors forum iti umuna a paset ti Disiembre tapno ammuenda ti karirikna dagitoy iti posible a panagbiahe ti eroplano ditoy tallo a daras tunggal lawas.

“Alaek ti suportayo a mamayor ta no agtultuloy daytoy, dakkelto ti maaramidanna iti turismo ti probinsia,” innayon ni Savellano.

Mainaig itoy, dinawat pay ti gobernador kadagiti local chief executives ti panangguyugoyda kadagiti kailianda nga agnaeden iti Metro Manila tapno mangbuangayda iti organisasionda.

Segun ken ni Savalleno,  dakkel ti maaramidan ti kaadda ti Metro Manila Associations ti tunggal ili ta isuda ti umunanto a tumulong kadagiti aktibidad nga isayangkat ti probinsia iti Kamaynilaan kas iti trade fairs.

“Ita ta sumangsango ti sangalubongan iti krisis pinansial, dagiti met laeng kailiantayo nga agnaeden iti siudad ti makitatayo a makatulong kadatayo,” kinuna pay ti gobernador.#