MAGSINGAL, Ilocos Sur – Dua nga aksidente ti nagsaruno a napasamak iti maymaysa a lugar a nakatayan ti maysa a motorista idi rabii ti Marso 21.
Segun iti report manipud iti polis ditoy, napasamak ti immuna nga aksidente iti national highway a sakup ti Barangay Barbarit idi agarup 9:30 iti dayta a rabii ket nainbolbar ditoy ti maysa a Racal Sport 110 motorcycle a minaneho ti maysa nga agnagan iti Naning Belandres ken nakisakayan ni Jimmy Suero y Flores, 20, baro, ken residente iti Barangay Sabang, Cabugao, Ilocos Sur.
Agpaamianan a direksion ti motorsiklo da Belandres idi napukawna ti kontrolna iti manibela ti lugan ket nagiwes daytoy iti makannawan nga abaga ti kalsada sa naikras.
Kas resulta, nagsagrap dagiti dua a biktima kadagiti dunor ket naitarayda iti Magsingal District Hospital para iti pannakaagasda.
Kabayatan ti panagimbestiga dagiti polis mainaig iti nasao nga aksidente, ken panagtrapikda kadagiti lumabas a lugan, insardeng apagbiit ni Rommel Guinto y Mallari, 39, naasawaan, ken residente iti Barangay Poblacion East, San Ildefonso, Ilocos Sur, ti kotsena ngem sinapgid ti napardas ti tarayna a nangisit a Honda TMX 155 a motorsiklo ti makannigid a bakrang ti kotse.
Kas resulta, naikras ti motorsiklo ket naipalladaw ti nagmaneho iti motorsiklo a ni Ismael Sagadraca y Ulopani, 28, baro, ken residente iti Barangay Macadcatud, Magsingal ni Sagadraca iti sumagmamano a metro ket nupay naitaray iti Magsingal District Hospital, indeklara ti doktor a nangtaming kenkuana a dead on arrival.
Saan a naan-ano ti drayber ti kotse.
Kabayatanna, saan met a naidanon ti biag ti sabali pay a motorista gapu iti pannakaaksidentena iti rangtay sadiay Barangay Poblacion East, San Ildefonso, Ilocos Sur idi parbangon ti Marso 25.
Naideklara nga awanen ti biag ni Froilan Cañero y Fagela, 22, residente iti Barangay Borobor, Sto. Domingo, Ilocos Sur idi maidanon iti Metro Vigan Cooperative Hospital iti Bantay, Ilocos Sur.
Kas maibatay iti inbestigasion, agpaamianan a direksion ti motorsiklo a minaneho ni Cañero a nakisakayan ni Michael Fagela, kalugaranna, ket iti nagkurbaan iti rangtay, napukaw ni Cañero ti kontrolna iti manibela ket nadungparna ti sementado a railings ti rangtay a puon ti nakaikrasanda iti kalsada.
Nagsagrap dagiti biktima kadagiti serioso a dunor ket naitarayda iti ospital, saanen a naiyabot pay ti biag ni Cañero.#