2 akusado iti murder, inaresto dagiti polis

VIGAN CITY – Dua a lalaki nga akusado iti pammapatay ti nagsina nga inaresto dagiti polis iti dua a barangay ditoy siudad idi Agosto 15.

Immuna nga inaresto ti nagtipon nga elemento ti Abra provincial police office nga indauluan ni Police Supt. Juan Cantoria Collo ken ti Vigan City police nga indauluan ni OIC, Police Chief Inspector Ernesto P. Navarro ni Edgar dela Cruz y Alamar, 46, naasawaan ken residente iti Barangay 9 ditoy siudad.

Ni dela Cruz ti No. 3 a most wanted person iti rehion ti Cordillera, ket sumangsango iti kaso a murder  iti sala ni Judge Clarito Gonzales ti Regional Trial Court, Branch 1, Bangued, Abra.

Awan ti nairekomenda a piansa ni dela Cruz mainaig iti kasona a nai-docket iti babaen ti Criminal Case No. 2005-014 a napetsaan iti Pebrero 9, 2005.

Simmaruno a nagturong ti nasao met laeng a bunggoy iti Barangay Salindeg ditoy met laeng siudad ket inarestoda ni Bernardo Combis y Tumbaga, 53, naasawaan, taga-Barangay Villa Mercedes, San Quintin, Abra ngem agnaeden iti Barangay Salindeg.

Nakalista ni Combis a maika-13 a most wanted person iti rehion ti Cordillera ket sumangsango met iti murder a nai-docket iti babaen ti Criminal Case No. 1232 iti sala ni Judge Francisco Villarta, RTC Branch 1, Bangued Abra a napetsaan iti Abril 27, 1993.

Naipan dagiti naaresto iti Abra Provincial Police Office para iti umisu a disposision.#