Footer

2 babai a nagkikil, natiliw iti entrapment operation

CANDON CITY – Dua a babai nga extortionist ti natnag iti ima dagiti polis iti entrapment operation nga insayangkat dagitoy idi malem ti Septiembre 7.

Nabigbig dagiti nagkikil a da Glenor Vallejos y Gramaje, 53, naasawaan, ken Kriska Vallejos y Garamaje, 27, balasang, agpada a residente iti Barangay San Isidro ditoy siudad.

Insayangkat dagiti polis nga indauluan ni PCI Marlo A. Castillo, hepe ti polis ditoy, ti entrapment operation kalpasan a nagpulong da Rolando Pasahol y Abrenica, 53, naasawaan, negosiante, ken ni Dr. Carlos Pasahol, naasawaan, agpada a residente iti Barangay San Isidro, Candon City, gapu iti mapapati a pannakaawat ni Bienvenido Gabayan, naasawaan, negosiante, iti maysa a surat a dumawdawat iti kuarta kenkuana.

Linaon ti surat nga addaan iti letterhead a “Silangan Samahan ng Pulang Dragon” a mangted ni Gabayan iti P50,000 no dina kayat a saan a madangran daytoy ken ti pamiliana. Naibilin ken ni Gabayan nga ikabilna ti kuarta iti puraw a sako ket maibati iti naituding a lugar a mapan alaen ti dua a babai iti agarup alas 4 ti malem.

Iti nasao a lugar, dua a babai ti nagturong iti nakaikabilan ti kuarta ket maysa kadakuada ti nangpidut iti sako a nakaikabilan ti kuarta.

Ngem di ammo dagitoy nga agur-urayen dagiti polis a mangtukma kadakuada. Narekobre dagiti polis ti sako a naggianan ti kuarta ken ni Glenor Vallejos.

Iti pannakaisurat daytoy, naipilan ti kaso a robbery with intimidation maikontra ken ni Glenor Vallejos iti Candon City prosecutor’s office.#