2 babai nainbolbar kaskaso panagtakaw, naaresto

CABUGAO, Ilocos Sur – Dua a babai nga akusado iti sumagmamano a panagtakaw ti inaresto dagiti nagtipon nga elemento ti kapolisan itay nabiit.

Tallo a grupo ti nagtipon nga elemento ti kapolisan a pakaibilangan ti Laoag City police station, PIB Ilocos Sur PPO ken kapolisan ditoy nga ili ti nangaresto ken ni Ester Basuil y Cinco aka Ester Basuil y Sinco, 67, balo, ken ni Lorna Pagud y Maraña, 49, naasawaan, agpada a residente iti Barangay Pug-os, ditoy nga ili.

Nakalista ni Basuil a numero 9 idinto a numero 10 ni Pagud a most wanted persons iti provincial level kas target ti Lambat Sibat Priority.

Tallo a warrant of arrest ti imet dagiti operatiba para iti pannakaaresto ni Basuil idinto a dua a warrant of arrest ken ni Pagud gapu iti kasoda a theft nga inyisio ti tallo a judge manipud iti Pangasinan.

Inyisio ni Judge Genoveva Coching-Maramba ti Regional Trial Court Branch 44, Dagupan City, Pangasinan ti warrant of arrest maikontra ken ni Basuil gapu iti kasona a theft babaen ti Criminal Case No. 2015-0477-D a napetsaan Hunio 16, 2015 ket nairekomenda nga agpiansa iti P30,000.00.

Sabali ti alias warrant of arrest nga inyisio met laeng ni Coching-Maramba maikontra ken ni Basuil gapu iti kasona a theft kas maibatay iti CC No. 2015-D a napetsaan iti Septiembre 22, 2015.

Sabali pay a warrant of arrest maikontra ken ni Basuil nga inyisio ni Judge Arleen T. inyisio ni Judge Arleen T. Rodelas-Orpilla ti First Judicial Region, Natividad-San Quintin, Natividad, Pangasinan a napetsaan iti Oktubre 16, 2015 gapu iti kasona a theft iti babaen ti CC No. 3170. Nairekomenda nga agpiansa ni Basuil iti P12,000.00 para iti temporario a pannakawayawayana.

Kabayatanna, dua nga alias warrant of arrest ti inyisio ni Coching-Maramba maikontra ken ni Lorna Pagud y Maraña, gapu iti kasona a theft a naipababaen iti CC No. 2015-0501-D ken 2015-0477-D a napetsaan iti Septiembre 22, 2015 ken Hunio 16, 2015.

Nairekomenda nga agpiansa ni Pagud iti P24,000.00 ken P30,000.00 gapu kadagiti nasao a kasona.

Adda iti kustodia ti Cabugao police station dagiti akusado para iti umisu a disposision.#