2 babai, napalab-ogan iti buy bust operation

CANDON CITY – Saanen a lallaki laeng ti aglaklako iti droga, pati payen babbai, malaksid a saanda a taga-ditoy siudad no di ket natiboda iti sabali a probinsia.

Idi agarup 3:30 ti malem ti Oktubre 29, tiniliw dagiti nagtitipon nga elemento ti Candon City police station, PDEA INIS ken ICAG, Ilocos Sur Chapter babaen ti insayangkat a buy-bust operation sadiay Rosebeth Inn, Barangay Paras, da Emily Balingit y Monhi @ “Lovely”, 32, awanan asawa, natibo iti Barangay Lungos, Calumpit, Bulacan ken Myra Angolo y Pappia-Ao @ “Janell”, 30, awanan asawa, ken natibo iti Barangay New Poblacion, Burgos, La Union ken agpada a residente iti Barangay Calaoa-an, Candon City.

Nakakumpiska dagiti polis iti ikut dagiti suspek iti maysa a heat sealed transparent plastic sachet a naglaon iti white crystalline substance a masuspetsa a shabu; maysa a rolled aluminum foil; 3 a cellular phone a nagmarka iti Kata, Samsung ken Nokia; maysa a lighter; 2 a sag-P500.00 bill a naaramat a buy bust money; ken nalabaga a Racal motorcycle.

Naipan dagiti suspek agraman dagiti nakumpiska kadakuada iti police station para iti umisu a disposision.
Kabayatanna, maysa a menor de edad ti nasukalan dagiti polis a masuspetsa nga agus-usar iti droga idi rinespondeanda ti tawag iti telepono nga adda menor de edad nga agriribuk iti uneg iti balayda sadiay Barangay Pangada, Sta. Catalina, Ilocos Sur.

Nagturong dagiti polis iti panangidaulo ni SPO4 Christopher Bueano babaen ti direkta superbision ni PSI Manuel a. Viaje, OIC, apaman a nakaawatda iti tawag iti telepono manipud ken ni Julita Razonable a rirriribuken ida ni Mark Rodolf Razonable, 17.

Nadatngan dagiti polis nga agririaw ti suspek ngem idi makita dagiti polis, dagus a nagtaray iti kuartona.

Pinasurot ni Razonable dagiti polis iti uneg ket nakita dagiti polis dagiti drug paraphernalia a pakaibilangan ti maysa nga aluminum foil nga addaan shabu residue; maysa nga improvised tooter rolled aluminum foil; 7 a babassit a narolio nga aluminum foil; 2 a lighter ken getteng.

Nayendorso ti kaso a panaglabsing iti Section 12 ken 15 ti RA 9165 maikontra ken ni Razonable iti provincial prosecutor’s office a nai-docket a NPS no. I-03-INV-14J-00567.

Naikustodia ti menor de edad iti lolana a ni Julita Razonable babaen ti yaanamong ti MSWD.#