Footer

2 babai napaltogan; dead on the spot ti maysa, grabe iti ospital ti sabali

STA. MARIA, Ilocos Sur – Saan pay nga ammo ti motibo iti pannakapaltog ti dua a babbai iti uneg ti kaserada sadiay Barangay Poblacion Norte, ditoy nga ili idi rabii ti Nobiembre 30 a nakagudasan ti maysa.

Mapapati nga awanen ti biag ni Maria Elena Ancheta y Balingit, aka Sam, awanan asawa, ken residente iti #147 Magallanes, St., Guadalupe, Makati City, idi masarakan iti kuarto gapu iti grabe a sugatna iti ulo ken bagina.

Bayat ti pannakaisurat daytoy, awan pay ti puot ni Rubylene Abit y Andaya, aka Mia, 25, natibo iti Calbayog City, Samar ngem nailanad ti adresna a Barangay San Jose, Narvacan, iti Intensive Care Unit ti Metro Vigan Cooperative Hospital a nakaiyalisanna.

Segun iti inisial nga inbestigasion dagiti polis, idi simmangpet ni Len Galimba y Galay, maysa nga agkaskasera iti nasao a balay a kukua ni Fredelina Arota iti Barangay Poblacion Norte, ken dagiti kaanakanna, nakangeg iti nakapsut a timek a mangaw-awag kenkuana.

Idi nagturong ni Galimba iti ngato a yan ti kuarto ni Abit, nakitana a nakadalutaytay dagiti biktima a nadigos iti bukodda a dara.

Nagpaarayat ni Galimba iti kaarrubada a dagus a nagpatulong iti polis.

Intaray dagiti nagresponde a polis ni Abit iti Central Ilocos Sur District Hospital sa naiyalis iti Metro Vigan Cooperative Hospital para iti pannakaoperarna maigapu kadagiti sinagrapna a sugat iti akimbaba a paset ti bagina.

Cal. 45 ti mapapati a naaramat iti pammaltog kas maibatay kadagiti kapsula ken buli a nasarakan dagiti kameng ti SOCO, Ilocos Sur PPO iti crime scene.

Agtultuloy ti panagimbestiga dagiti polis no asino dagiti nangpaltog kadagiti biktima ken no ania ti motibo ti pammaltog.#