2 babbai, natiliw a nagsipdut

NARVACAN, Ilocos Sur – Dua a babbai ti natiliwan a nangsipdut iti petaka ti maysa a kostumer iti tiendaan publiko ditoy nga ili idi bigat ti Abril 29.

Naipan iti police station ditoy nga ili ni Fely Sinco y Mar, 60, naasawaan, ken residente iti Barangay Padual ken ni Lisa Padua y Solis, 55, balo, ken residente iti Barangay Bessang, Cabugao, Ilocos Sur gapu iti panangsipdutda iti petaka ni Ligaya Casuliar y Viloria, 55, naasawaan ken residente iti Barangay Sta. Lucia, ditoy nga ili.

Nasiputan ti maysa nga umili ti inaramid dagiti dua isu a ginammatanna ti ima ti maysa kadagiti suspek sana impaima iti polis nga agpatpatrolia iti public market.#