Footer

2 balay, nasukisok, armas, balbala, droga, nakumpiska

SAN JUAN, Ilocos Sur – Nadumaduma a klase ti paltog, balbala ken droga ti nakumpiska dagiti polis iti sinukisokda a dua a balay idi Pebrero 10 iti Barangay Caronoan ditoy nga ili.

Sinukisok dagiti nagtipon nga elemento ti PDEA Ilocos Sur, Provincial Anti-Illegal Drug Special Operations Group, Sta. Catalina PNP, ken San Juan PNP ti pagtaengan da Odon Quilala, residente iti Barangay Caronoan nga aglaklako iti droga ken ni Saturnino Vagay, DILG officer ket nakakumpiskada kadagiti paltog, balbala ken droga.

Nakakumpiska dagiti polis iti balay ni Quilala iti 11 a plastic sachet a mapapati a naglaon iti shabu, cal. 45 1911 pistol, 2 magasin ti cal. 45, 3 selpon, 18 a bala ti cal. 45.

Nakakumpiska met dagiti polis iti balay ni Vagay iti cal. 22 rifle, cal. 30 carbine, shotgun, magnum 357, 4 a magasin ti nadumaduma a klase ti paltog, ken nadumaduma ti klase a bala.

Imet ti raiding team nga indauluan da Supt. Emmanuel Reyes, Supt. Panfilo Racho ken babaen ti direct super-vision ni Provincial Director Police Senior Supt. Eduardo Dopale ti search warrant a pinirmaan ni Judge Francisco Ante, Jr.

Iti pannakaisurat daytoy, naipilan ti kaso maikontra kadagiti dua iti provincial prosecutor’s office.#