2 balay nasukisok, paltog, balbala, kinumpiska dagiti polis

STA. MARIA, Ilocos Sur – Tallo a tattao ti inaresto dagiti polis kalpasan a nagbalin a positibo ti insayangkatda a naggiddan a panagsukisok iti dua a balay iti Barangay Maynganay ditoy nga ili idi agsapa ti Enero 14.

Iti immuna nga operasion, sinukisok dagiti nagtipon nga elemento ti RID, PRO1, CIDG ken police station ditoy nga indauluan ni Police Senior Inspector Luis Lipadan, ken CIDG, ISUR nga indauluan ni PChief Inspector Modesto Flores Carera  ti balay da Ernesto Dasalla, Jr., 62, ken Ernesto Dasalla III, 32, agpada a residente iti Barangay Maynganay.

Naigiddan met a sinukisok ti sabali a grupo ti RID, PRO1 ken Sta. Maria police station nga indauluan met ni Senior Inspector Jeofrey Sanchez ti balay ni Erwin Casuga y Ramos, residente met laeng iti Barangay Maynganay.

Agpada dagiti operasion a naisayangkat babaen ti bileg ti search warrants No. 90 ken 91 nga inyisio ni Judge Sixto Diompoc ti RTC Branch 72, Narvacan, Ilocos Sur ken iti direkta a superbision ni Senior Supt. Jemar Delgado Modequillo, Acting Provincial Director.

Nakakumpiska dagiti polis iti balay dagiti agama a Dasalla iti maysa a Caliber .38 revolver nga addaan serial no. 1418, hand grenade without marking, 2 rounds live ammos para Caliber .38, maysa a homemade a paltog a saan nga ammo ti kalibrena, maysa a kapsula para iti cal. 45,  maysa nga improvised magazine para Caliber 5.56 armalite rifle, maysa a baby armalite airsoft rifle, 2 magazines para air soft rifle ken maysa a black belt bag a nagmarka iti Sports USA.

Maysa a 12 gauge shotgun nga addaan marka nga  Akkar Karatay Taktik, TS870BD-N-12/76 ken serial number a 6567903, 18 bala para gauge 12  ken maysa a long firearm leather case ti naala dagiti operatiba iti balay ni Casuga.

Sinaksian dagiti opisial ti barangay a pakaibilangan da Barangay Kagawad Deborah Susan P. Ramos, Sonia Manlapao and Albert Dela Cruz ti panagsukisok iti balay dagiti ag-Dasalla idinto a saksi iti search operation iti balay ni Casuga ni Jennifer nga asawana ken dagiti barangay officials nga indauluan ni Barangay Captain Mendrade C. Mina.

Naikustodia dagiti suspek ken dagiti nakumpiska kaniada iti police station para iti umisu a disposision idinto a naipababaen dagiti paltog iti beripikasion iti Firearms and Explosives Office, Camp Crame.#