2 balay, natakawan

STA. CATALINA, Ilocos Sur – Nargaan unay ti turog daytoy biktima isu a dina napuotan a natakawan gayamen idi parbangon ti Hunio 27.

Naduktalan laengen ni Jaypee Rafal y Cariño, 26, naasawaan, merchandizer ti Philcusa Company, Vigan City, a natakawan gapu iti ariwawa iti kaarrubana nga adda nagpanggep nga agtakaw.

Natakaw iti balay ni Rafal ti maysa a Macbook laptop, Toshiba i3 laptop, Star Rubie engaged tablet, Cherry Mobile Flare cellphone, 2 balitok a kuentas, maysa paris nga aritos,  bateria ti Lenovo laptop, cash money nga agdagup iti sumurok kumurang P7,000.00.

Segun iti report, nasiputan ni Geremy Bacuyag y Rafal, 29, naasawaan, pharmacy assistant iti Mercury Drug, Vigan City, ti maysa nga ima ti di nabigbig a lalaki iti nakalukat a tawa a nakaiggem iti atiddog a kawayan ket suksukiten daytoy ti tablet personal computer nga adda iti uneg ti kuartoda.

Nagpukkaw ni Bacuyag ket nakigtot ti suspek a naglibas iti laud a direksion.

Nakariing met ni Rafal gapu iti ariwawa ket naduktalanna a natakawan met gayamen.

Mapattapatta nga agdagup amin iti P74,500.00 ti pateg dagiti natakaw ken ni Rafal.

Bayat ti panagsawar dagiti kabagian ti biktima, naduktalanda a nadadael ti steel fence iti likudan ti balay ket ditoy ti mapapati a simrekan dagiti mannanakaw.

Madama ti panagimbestiga dagiti polis mainaig iti nasao a panagtakaw.

Daytoy ti umuna a gundaway nga adda naireport a panagtakaw iti pagtaengan iti umuna a distrito ti probinsia kalpasan ti serye ti panagtakaw iti tallo a pagtaengan a mapapati a naisayangkat iti maymaysa a rabii.

Idi kanikadua a lawas, Hunio 13, tallo a pagtaengan ti nagsasaruno a natakawan iti Barangay Dili, Mambog, ken Gabur Norte, agpapada a barangay ti Sta. Cruz, Ilocos Sur.

Natakawan ti pagtaengan ni Maria Lilibeth Javonitalla y Leswe, 42, residente iti Barangay Gabur Norte; Violeta Javonillo y Javinar, 57, residente iti Barangay Mambog; ken Denie Sarmiento y Corpuz, 39, residente iti Barangay Dili.

Natakaw iti balay ni Javonitalla ti Cherry mobile cellphone ken MyPhone, KMC flat  screen TV, TV/Cable converter, bag ken P2,450.00.

Iti Barangay Mambog, kinurimes dagiti di nabigbig a mannanakaw iti balay ni Violeta Javonillo, maysa a head teacher, ti maysa a Guess watch, Fossil watch, shoulder bag a naglaon kadagiti assorted items, Nike jacket, maysa a bag a naglaon iti wallet a nag-gianan dagiti ID ken ATM ni Juliet Javonillo ken 2 a cellular phones.

Sadiay Barangay Dili,  natakaw iti balay ni Denie Sarmiento y Corpuz, 39, ti maysa a Global Positioning System (GPS), Nokia cellular phone, ken P500.00.

Intaray pay dagiti mannana-kaw iti dayta met la a rabii ti Rusi 100 motorcyle a kukua ni Noli Javonitalla y Sanchez, 42, security guard, ken residente iti Barangay Gabur Norte.

Nupay kasta nasarakan sadiay Barangay Dili ti Rusi 100 a napudasdasan a kukua ni Javonitalla; Rusi 150 a kukua ti maysa a Felix Albalos Ayaquil, taga-Barangay Rizal, Tagudin, Ilocos Sur; ken ti motorsiklo ni Sarmiento.

Nasukainan dagiti nagres-ponde a polis iti compartment ti Rusi 100 dagiti selpon, ken card holder dagiti nadumaduma nga ID ni Violeta Javonillo.

Nasarakan met iti Barangay Mantanas dagiti personal belongings ti head teacher , kasta met ti flat screen TV a natakaw iti balay da Maria Lilibeth Javonitalla.#