2 balay, natakawan

BANTAY, Ilocos Sur – Dua a pagtaengan ti nagsaruno a natakawan ditoy nga ili idi Septiembre 14 ken 9.

Nagpulong iti polis dagiti agassawa a Judy Casallo y Diaz, 48, naasawaan, mensahero ken Rosalie Casallo y Tapak, 41, natibo ti Barangay Biao, Sta. Maria, Ilocos Sur a sinerrek dagiti mannanakaw ti pagkaskaseraanda a balay iti Sitio Purok, Barangay Balaleng ditoy nga ili idi rabii ti Septiembre 14 ket kinasakasda dagiti assorted nga alahas ken dua a selpon a mapattapatta nga agpateg amin iti sumurok kumurang P68,000  ken cash nga agdagup iti P5,900.

Segun kadagiti biktima, natakuatanda laengen ti panagtakaw idi makariingda iti bigatda ket nakitada a nakalukat ti kabinet ken naiwaran ti petakada ken PSP pouch ken dadduma pay a gargaretda iti suelo.

Iti panagimbestiga dagiti polis, natakuatanda a nakastrek dagiti mannanakaw iti uneg babaen ti ikakalay-atda iti diding iti sango nga agturong iti terrasa iti maikadua a kadsaaran sada naglibas iti main door ti ground floor.

Nakaala dagiti nagresponde a SOCO team ti ISURPPO nga indauluan ni SPO4 Reynaldo Anicoche kadagiti lemma ti ramay iti nakapasamakan ti krimen a manamnama a makaited iti lead iti kinasiasino dagiti nagtakaw.

Kabayatanna, mapapati a panagtakaw ti motibo ti pannakabagbagsol ti maysa a baket nga agnaed iti Zone 1, ditoy met laeng nga ili idi rabii ti Septiembre 8.

Segun iti palawag ni Anastacia Jao y Pilot, 81, balo, ken residente iti nadakamat a barangay, agin-innaw iti lunglongan iti dayta a rabii idi maysa a babai ti immasideg iti likudanna sana tinagbat ken minalo iti tubo a nagsagrapanna iti sugat iti ulo ken nadumaduma a paset ti bagina.

Iti panagimbestiga ti SOCO team nga indauluan ni PCI Leonardo Quitevis Arce, kinasakas ti di nabigbig a suspek dagiti assorted nga alahas ti biktima.

Natakuatan ti napasamak iti biktima idi nagsuspetsa ni Fatima Ricamora y Foronda, 43, kaarruba ti biktima, no apay a nakalukat ti gate ti balay ket idi simmirip iti uneg ti balay, nakitana laengen ni Jao a nakadalutaytay iti suelo a nadigos iti bukodna a dara.

Madama ti panagimbestiga dagiti polis mainaig iti nasao a panagtakaw ken pananggandat iti biag ni Jao.#