2 balay, sinerrek ti mannanakaw

STA. MARIA, Ilocos Sur – Dua a balay iti Poblacion ditoy nga ili ti natakawan iti selpon ken kuarta idi parbangon ti Enero 14.

Iti report manipud iti polis ditoy, sinerrek ti mannanakaw ti dua a balay ni Arthur Agatep y Brillantes, naasawaan, retirado a maestro ken residente iti nadakamat a barangay, babaen ti panangkalay-atna iti kongkreto nga alad, immuneg iti maikatlo a kadsaaran ti balay sa simrek iti kuarto ni Grace Agatep y Domingo, 28, naasawaan ket kinurimesna ti selpon daytoy.

Simmaruno a simrek ti mannanakaw iti kuarto ni Liberty Agatep y Molina, 29, naasawaan, empleado to Rural Bank, Sta. Maria, sana innala ti bag ti biktima a naggianan ti selpon daytoy a X-2 Nokia ken Cherry ken cash money a P15,000.00.

Nakariing ni Liberty ngem binallaagan ti di nabigbig a mannanakaw  nga adda dakes a mapasamak kadagiti annakna no agiriag.

Naglibas ti suspek babaen ti main door sa nagpaamianan a direksion.#