2 balay, sinukisok dagiti polis

STA. CRUZ, Ilocos Sur – Dua a balay iti Barangay Lantag ditoy nga ili ti rinikisa dagiti polis idi agsapa ti Abril 12 a nakakumpiskaanda kadagiti paltog ken balbala.

Nakumpiska iti balay ni Buenaventura Lozano y Rabago ti dua nga airgun a nakonbert a cal. 22, 4 a bala ti cal. 45, 5 a bala ti cal. 38 special, 28 a bala ti cal. 22 ken maysa a bala ti cal. 25 idinto a maysa nga improvised gauge 12 backshot, 2 a bala ti cal. 45, ken 2 a bala ti cal. 38 ti naalada dagiti nagsukisok iti balay ni Rodrigo Rabago, Jr. y Ambrosio.

Imet dagiti nagtitipon nga elemento ti ISPPSC, Ilocos Sur PPO, polis Sta. Cruz ken CIDG iti panangidaulo da PCI Arbel C. Mercullo ken PCI Pedro Rafanan, Jr. dagiti dua a search warrant a pinirmaan ni Judge Francisco Ante, Jr. ti MTC ti Vigan City idi insayangkatda ti panagsukisok iti balay dagiti suspek.

Naipila iti provincial prosecutor’s office, Vigan City, ti kaso a panaglabsing iti PD 1866 kas inamendar ti RA 8274 maikontra kadagiti dua.#