2 barangay, benepisario ti Bottom-up Budgeting

CABUGAO, Ilocos Sur – Dua a barangay ditoy nga ili ti immawat iti pondo a nagtaud iti Bottom-up Budgeting (BUB) a programa ti nasional a gobierno itay nabiit.

Immawat ti Barangay Marga-ay ken Sabang iti tseke nga aggatad iti P1.6 million manipud iti BUB program ti national government para iti pannakaipatakder iti saggaysada a day care center.

Inawat ni Mayor Edgardo S. Cobangbang, Jr. ti nasao tseke, kaduana dagiti konsehal ti ili a pakaibilangan da SBM Atty. Bryan Jett S. Pano, chairman iti committee on social services ken ni SBM Benedicto M. Savellano, Municipal Treasurer Lourdes A. Azcueta ke ni Municipal Social Welfare and Development Officer Lydia S. Gazmen.

Maysa a programa ti Department of Budget and Management ti BUB a kangrunaan a panggepna ti pannakaital-o ti pakabuklan a kapasidad dagiti lokal a gobierno, nangruna iti pannakaideliber dagiti basic social services a mangidur-as kadagiti industria a makaited iti panggedan ken pagbiagan dagiti umili.#