2 barangay kagawad, napaltogan

SANTA, Ilocos Sur – Dua manen a barangay kagawad ti nagbalin a biktima ti nagsina a pammaltog ditoy nga ili idi Hulio 4 a puon ti nakagudasan ti maysa.

Napasamak idi agarup alas 8:20 ti rabii idi Hulio 4 ti immuna nga insidente ti pammaltog iti Barangay Manueva a nakayospitalan ni  Mariano Tejada, Jr., y Balbuena, 45, naasawaan ken residente iti nadakamat a barangay.

Iti panagimbestiga dagiti nagresponde a polis, sakbay ti pammaltog, naggiinom da Tejada ken Rolando Poblete iti balay ti naud-udi ket mapapati nga agkurang ti ininomda isu a naggawid ti biktima tapno mapan mangala iti igatangna iti arak.

Idi makadanon ti biktima iti nasipnget a paset ti dalan nga asideg iti ruanganda, pinaltogan ti di nabigbig a tao a nakapuntaan ti makannigid a barukongna ken ti makannigid a paset ti tianna.

Naitaray ni Tejada iti Gabriela Silang General Hospital idinto a naglibas ti nangpaltog kenkuana.

Mapapati a homemade shotgun ti naaramat iti pammaltog kas maibatay kadagiti sugat ti biktima.

Kabayatanna, sabali pay a barangay kagawad ti napaltogan iti Barangay Casiber ditoy met laeng nga ili idi agarup alas 9:00 ti rabii iti dayta met laeng nga aldaw.

Napaltogan ni Cesar Trinidad y Fernandez, 49, residente iti nadakamat a barangay ket nainaganan ti nangpaltog kenkuana a ni Jonathan Asuncion y Bulseco, 34, naasawaan, kalugaran met laeng ti biktima.

Naammuan iti report a nagsubang ni Trinidad ken ni Asuncion iti maysa a natayan ket inasut ti suspek ti paltogna sana pinaputokan ti biktima iti sumagmamano a daras a nakasugatan daytoy iti nadumaduma a paset ti bagina.

Naitaray ti biktima iti Central Ilocos District Hospital ngem pimmusay bayat ti pannakatamingna.

Boluntario a simmuko ti suspek kadagiti barangay officials ti Barangay Racho ditoy met laeng nga ili.

Mapapati a cal .38 ti inaramat ti suspek a pinangpaltog iti biktima. Saan a narekobre dagiti polis ti paltog.#