2 baro kimmabil iti polis, nakasuan

ALILEM, Ilocos Sur – Nakasuan iti direct assault on a person of authority ti dua a baro a kimmabil iti polis idi Disiembre 9.

Naipaima itay Disiembre 15 ti nasao a kaso maikontra kada Alejo Tamtam, Jr. y Suoc, 20, baro ken TobioTigeo y Degito, 23, baro, agpada a residente iti Mangcoybot, Alilem Daya iti opisina ti provincial prosecutor babaen ken ni Associate Provincial Prosecutor Arceli Perla Y. Rebollido-Refuerzo.

Maipalagip nga idi Disiembre 9, nakaawat ti police station ditoy iti text message iti kaadda ti riri iti nagbaetan ti tallo a lalaki idi agarup 9:43 ti rabii ket napanda iti nadakamat a lugar tapno beripikaranda ti kinaagpaysona.

Iti panagimbestigada, nakisubang da Tamtam ken Tigeo iti maysa nga agnagan iti Brenton Wandale, residente iti Barangay Alilem Daya.

Bayat ti panagsusubangda, mapapati a kinugtaran ni Wandale ti bukot ni Tamtam ket nagprobokar ti naud-udi.
Inanawa dagiti nagresponde a polis ni Tamtam ngem dinisnog ketdi ti suspek ni SPO1 Alfredo C. Cabanting, Jr. ngem dina nadissuan.

Timmulong pay ni Tigeo a nakirupak kadagiti polis a nagtungpal iti pannakadunor ti palasingsingan a ramay ken makannigid a tammudo ni Cabanting.#