2 baro, nadunor iti aksidente

VIGAN CITY – Dua a baro ti nadunor gapu iti pannakatulid ti motorsikloda iti rangtay iti asideg ti Barangay Beddeng Laud ditoy nga ili idi Oktubre 21.

Natukkol ti kannigid a luppo ni Rey Tacason, 16, baro, taga-Sto. Domingo, Ilocos Sur idinto a nadunor met ni Jake Rialubin, 20, baro, residente iti Poblacion, San Vicente, Ilocos Sur gapu iti nasao nga aksidente.

Segun iti report, linabsan ni Rialubin ti maysa a lugan iti asideg ti rangtay iti nadakamat a barangay ngem dina nakontrol ti motorsiklona a nakaigapuan ti pannakatulidda.

Naitaray dagiti dua iti Gabriela Silang General Hospital tapno maagasanda.#