2 baro, nasukalan iti ikutda dida kukua a motorsiklo

STO. DOMINGO, Ilocos Sur – Dua a lalaki ti naireport nga agidurduron iti motorsiklo a mapapati a natakaw iti beach road ti Barangay Poblacion, ditoy nga ili idi agsapa ti Mayo 15.

Nagresponde dagiti polis kalpasan a nakaawatda iti awag iti selpon ket nasalamaanda da Oliver Tapuro y Pangramuyan, 17, ken residente iti Sitio Payad, Barangay Cabaritan, ken Dominic Soliven y Tapuro, 16, ken residente iti Barangay Pangpangdan, ditoy met laeng nga ili, nga agidurduron iti Suzuki Raider, awanan plate number, maris kombinasion a nalabaga ken nangisit, addaan iti chassis no. BE4EA-100714 ken engine No. E433-400761.

Idi napagsaludsodan dagiti dua no kukuada ti motorsiklo nga idurduronda, imbaga dagitoy a kukua ti maysa a Rick a taga-Barangay Cuta, Vigan City.

Naipan dagiti suspek ken iti motorsiklo iti police station para iti umisu a disposision.#