2 baro, natiliw gapu iti indiscriminate firing

SANTA, Ilocos Sur – Kalamiis ti tiempo gapu iti di agressat a panagtudona ken mayat ti ‘agpapudot’ tapno maiwaksi ti lam-ed. Yan ti adatna, dagiti sumagmamano ket masobraanda ti mainumda a makagapu iti panagaramidda iti saan a rumbeng ken mailabsing iti linteg.

Gapu iti daytoy, saganaan da Archie Garcia y Villanueva, 29, baro, ken residente iti Barangay Marcos District, Santa, ken ni Dexter Vita y Corpuz, 35, baro, mannalon ken residente iti Barangay Caronoan, San Juan, ti maipila a kaso a panaglabsing iti RA 10591 ken indiscriminate firing maikontra kadakuada.

Mapapati a nabartek dagiti dua idi nagpaputokda.

Iti report manipud iti Santa police station, aggiinom da Garcia ken kakaduana iti balay ti maysa a Baltero iti nadakamat a barangay idi inruar ti suspek ti paltogna sana imputok iti sirok ti lamisaan.
Ginammatan ni Elgin Pagad y Bello, maysa kadagiti aggiinom, ti paltog ket impaimana kadagiti nagresponde a polis.

Inyawid met ti kayongna ni Garcia ket idi agarup 11:05 iti dayta met laeng a rabii, kinuyog dagiti dadakkelna ti suspek a simmuko iti polis.

Adda itan iti kustodia ti polis ti paltog ni Garcia a nagmarka iti Trademark made in USA M.22 Colt a nagkarga iti tallo a bala ken maysa a naiputok a cartridge case para iti umisu a disposision.

Iti met kaaspingna a damag, nagresponde dagiti polis idi nakaawatda iti report manipud ken ni Barangay Captain Bello Joseph Valoroso nga adda agprobprobokar iti balay ni Dexter Vita y Corpuz.

Idi asidegen dagiti polis, nakangegda iti kanalbuong ket nakitada ti suspek a nakaiggem pay laeng iti paltogna.

Inaresto dagiti polis ti suspek sada impan iti Magsingal District Hospital para iti medical examination ken impan iti police station agraman ti paltogna a maysa a rifle .22 caliber (converted) para iti dokumentasion ken umisu a disposision.#