2 benepisario ti 4Ps, nasuspenso

VIGAN CITY – Dua a kameng ti Pantawid Pamilyang Pilipino Program (4Ps) ti nasuspenso nga agawat iti benepisio gapu ta naglabsingda iti paglintegan daytoy a programa.

Segun ken ni Perry Costales, Vigan City link ti 4Ps, nasuspenso dagitoy dua a benepisario agsipud ta naduktalanda nga agsugsugal.

Nupay kasta, saan nga innaganan ni Costales dagiti nasuspenso iti listaan.

Kabayatanna, itay nabiit, sumagmamano a benepisario ti 4Ps ti nagadal iti panagproseso iti karne.

Nagyaman dagitoy 43 a benepisario iti 4Ps gapu iti daytoy nga inadalda tapno adda mainayon a pamataudan iti pamastrekanda.

Maysa a programa ti nasional a gobierno ti 4Ps a mangpabassit ti kinakurapay babaen ti panangtedna kadagiti grants kadagiti marigrigat tapno mapasayaatda ti salun-atda, nutrision ken edukasion nangruna dagiti annakda nga agtawen iti 0-14.#