2 biktima iti naiwawa a bala

BANTAY, Ilocos Sur – Maysa a lalaki ken maysa a babai ti nagbaro a tawen iti ospital gapu ta biktimada iti naiwawa a bala.

Naitaray iti Metro Vigan Cooperative Hospital iti agarup 12:15 kalpasan ti itatapog ti baro a tawen ni Edgar Tabangcura, 38, naasawaan, taga-Sto. Domingo, Ilocos Sur idinto nga alas 12:45 a naiserrek iti nadakamat nga ospital ni Rosemarie Riveta, 43, naasawaan, residente iti Malingeb, Bantay, Ilocos Sur gapu iti pannakatamada iti naiwawa a bala.

Segun iti report, madama ti panagpabettak ni Tabangcura iti rebentador iti sanguanan ti balayda idi madlawna a daradara ti kanawan a patongna.

Iti pannakaisurat daytoy, adda pay ti biktima iti ospital tapno maikkat ti bala iti patong ti biktima.

Madama ti pannangan da Riveta idi linussok ti bala ti sim ti pagtaenganda ket nadamgisan ti mugingna.

Naammuan a rimmuar met laeng ni Riveta kalpasan ti pannakaagasna iti nasao nga ospital.

Kabayatanna, maysa nga ubing a residente iti siudad ti Vigan ti naputokan ti imana bayat ti panangselebrarna iti Baro a Tawen.

Naitaray ni Vincent Farpali, residente iti Barangay Amianance, Vigan City iti agarup alas 11:45 iti Lahoz Clinic and Hospital gapu ta naputokan iti Piccolo ti makannawan a ramayna.

Iti sabali a damag, mapapati a napaltogan ti maysa a Singaporean national ti ramayna bayat ti panangdalusna iti paltogna.

Segun iti report, daldalusan ni Cyril Gomez, 55, agnaed iti San Julian Sur, Vigan City, ti paltogna a cal. 45 idi mapapati nga aksidente a nakalbitna daytoy a nakaburboran ti tammudona.

Di nailanad iti report no apay a daldalusan ti biktima ti paltogna iti kangitingitan ti selebrasion ti Baro a Tawen.#