Footer

2 biktima ti salvage, nabigbigen

CAOAYAN. Ilocos Sur – Nabigbigen dagiti dua a bangkay ti lalaki ti nasarakan sadiay Barangay Nansuagao ditoy nga ili idi Septiembre 13.
Segun iti report manipud iti polis ditoy, nabigbig dagiti bangkay a da Jhune Sundae Gapusan y Andres, 18, baro; ken ni Rein Jher Alejon Estabillo, 16, baro, agpada a residente iti Barangay XI, Bulbulala, Vintar, Ilocos Norte.

Mismo a dagiti kakabagianda ti nangbigbig kadagiti bangkay iti Holy Angel Funeral Homes, Vigan City, a nakaipananda para iti pannakaautopsiada.

Maysa a nangpadaras iti pannakatunton dagiti bangkay ti aruat dagiti biktima ken ti pannakasukain dagiti inbestigador iti maysa a wallet a naglaon iti ID ti back pack a nasarakan iti abay ti maysa kadagiti bangkay.

Nailanad nga akinkukua iti ID ti maysa a Richard Placido y Alejon, 39, ken residente iti Piddig, Ilocos Norte.

Nupay kasta, suspetsa dagiti inbestigador a saan a ti bangkay ti akinkukua iti nasao nga ID agsipud ta saanna a kalanglanga ti rupa a naipigket iti ID.

Maysa nga anggulo a kitkitaen dagiti polis ket biktima iti salvage dagiti dua a bangkay agsipud ta agpadada a nagsagrap kadagiti sugat a mapapati a gapuanan iti paltog.

Naduktalan ti pammapatay kalpasan nga inreport ni Barangay Captain Robert Gallardo iti polis a dua a bangkay ti lalaki ti nasarakan iti barangayna.

Segun iti report, nakaaruat ti maysa iti maroon maong pants, nangisit a diaket, nangisit a bull cap ken nakasalladay iti abagana iti maysa a back pack.

Nakasukain dagiti inbestigador iti uneg ti bag kadagiti aruaten ken maysa a cal. 38 Colt special nga addaan serial number a 488015.

Nagsagrap ti bangkay iti sugat a mapapati a gapuanan iti paltog iti tengngedna ken makannigid a paset ti siketna.

Nasurok a 55 kadapan ti kaadayo manipud iti umuna a bangkay, nakapasag met ti sabali pay a bangkay a nakaaruat iti asul a maong a pantalon, maris dapon a diaket, nangisit a bull cap ken maysa a back pack ti nasarakan iti abayna a nakasarakan dagiti inbestigador iti wallet a naggianan ti ID a nagbalin a lead iti pannakatunton iti kinasiasino dagiti bangkay.

Iti panagimbestiga ti SOCO team manipud iti Ilocos Sur Provincial Police Office, nakarekobreda iti dua a naiputok a cartridges ken maysa a deformed slug manipud iti cal. 45 iti nakapasamakan ti krimen.

Kitkitaen ti polis-Caoayan ti posibilidad a na-salvage dagiti biktima.

Iti pannakaisurat daytoy, awan pay ti suspek iti krimen ken no ania ti motibo ti pannakapapatayda.#